Festival de Escurralete

N le um notícia na inforpress sobre festival de Escurralete i n kria faze um pekeno komentário/diário sobre esse festival i se organização... pelo menos a o k dzem respeito. Pa primera vez n participá, integrond Banda MV (mais velhos, hehehehe) de Djodje.

Mar d'Canal
Bom.. txam komeçá de princípio prop: Kel viagem de barco 07:50 de plamanhã!! dpos de no ter tokod na Mindel Hotel na note/madrugada anterior foi um bokadin kansod kordá 06:25 pa ba panhá barco kel hora.. inda por cima mi e ktá mariá so de oiá barcos atrakod na cais, n tava kun tef-tef da gaita!! Ma pronto... Maju (nos Road Manager) komprá vomidrine i lá no faze um viagem trenkil.. so mi e k resolve bai na kel salão i foi um afronta de REGGAETON na um televisunzinha e ktáva logo d'cima de mim!! Moss!!! foi um curse intensivo de reggaeton!!

Recepção/Hotel
Kond no txgá lá e k koisas komeçá!! Dpos de ter fkod ta konxe kel senhora de organização, k dpos n bem a sabê ma ela e d grupo Juventude em Marcha, no po nos kosa na um Hiace i komo era logo la perto kel pensão (???) no resolve k no tava sbi ate lá a pé! tud trenkil! Era volta de 09:20 kond no txgá na kel pensão (???) i logo problemas komeçá... katinha kuartos disponivel (so dpois de meio dia!!!!!!) katinha seker um mesa ma kadera disponivel na kel bar pa tmá um pekeno almoço i pessoal tud kansod k vontade de tmá um bonhe, xei d fome i k kel kalor infrontod k tava na Porto Novo!!

Depos de uns dos troka de palavras kel senhora de organização ta resolvê otxá ma nos e mute xei de manias i k na kualker parte de munde koisas e assim i k ela ta faze parte de um grupo k já dá volta a munde inter (!!!!) i k ela e mais profissional do k kualker um de nos, portanto no devia era estod kete num lugar i esperá meio dia dá sem xatiss!! Epá!!!...mesmo kun ka kisesse, algum kosa dzem pam flipá!!!!! i pois! assim foi.. mas.. depos n oiá ma ka valia a pena falá ma alguem k katava ta intende i nem kria intende nada! no resolvê k no tava esperá pa fala ma Sr. Rildo Tavares k era responsável pa organização. Algun tempo depos el parce lá... el falá ma pessoal tud trenkil (deskulpas deli..deskulpas dalá...) i no kabá pa entrá na kuartos la pa volta de meio dia i kualker kosa... pronto.. kes kuarto era trenkil.. simples, limpo... alguns tinha kasa de bonhe privado.. ots katinha.... ma mesmo assim foi um ligria oiá um kaminha!!! mi n detá n durmi ate hora de check sound ...18:30!! nem n ká bá almuçá!

Check Sound
Praia de Escurralete e pirtin de Cidade(sim sim.. ja tem um ano...) de Porto Novo. Kel estrada e kool ate txga lá... dpois no teve k txi de korre na meio de um montanha de gente na kel praia, andá k tud nos intrumento pa uns kaminzin de kabra ate txga na kel palko. Moda Dany Petiot dze: kelá foi kamin mas ekisit k jal faze ate um Back Stage. Back Stage k na realidade katinha.. ma anyway... kel palko tava bem montod, espaçoso, alto, bons monitores, bom bateria, bom amplificador de guitarra, amp de baixo razoável...etc i tal... i um bom mixer pa monitores!! Pessoal simpático sempre pronto pa sbi li um kzinha.. baixa li un kzinha.... i rapidamente tud gente tava ta gostá de som de palko!! Som de frente, apesar de ka ser assim um kosa estrondoso, tava ORAIT!!!...i no bem dalá tud kontente!! konfiante ma tava ser um bom show visto 50% de um bom show e som dret!!

Show
Alinhamento de festival pa segundo dia era simples. Tinha pok grupos, ma destake tava ta bai pa um banda de kasa k faze abertura (Grupo Harmonia), dpos era vez de Djodje TC & MV, dpos tava segui um ot grupo de Sintanton k jam eskce nome... mas tarde tinha Dudu Araújo i dpos Jorge Neto. Um reparo so ta bai pa kel primera banda e k reklamá pamo es otxá ma es txás toká mute pok.. ma moda kel senhora dze: 1 hora era temp pa kada grupo!... bom.. no sbi no faze line check... td trenkil.. no toká 1 hora...es gostá!!! ("Porto Novo e sabe.... sabe ... p.... !Op!.. "já agora, kem k inventá esse line ahn?? hehehe.. jal vrá palavra de ordem de tud o k festa!!)

Pa konkluí.... organização de festival peká na uns ponto ma es kompensá na ots (refeições, transporte); som tava muto bom apesar de pok rekurse!.. kel Back Stage tem de ser espiod..(principalmente kel kamin ate txga lá).. alguem ta precisá de um lugar pa koncentrá ou mesmo pa finalizá alguns pontos antes de sbi pa palko; palko devia ter um perímetro de segurança.. se públiko engalfinhá es tava sbi na palko k txeu facilidade.. i katinha pessoal de segurança;...ma foi bunzin i na fim kel senhora de organização bem pedi nos deskulpas i el fka kool ma nos.. ah!! viagem de barco de regresso foi sabe p'afronta.. moda Manel D'Novas dze: No bem tud fliz pa morada (soncent!)...bzot fká dret!

P.S: Viva Vomidrine!!!

Foto: Liberal-Online