Carnaval

(foto: Paolo Manzoni www.caboverde.com)

Segunde alguns peskisadores, carnaval teve se origem diazá na mei d'munde! Sim sim.. mas antig do ki tempu de kanikinha! 10 mil on antes de Cristo. Es ta kontá k amdjer ma home i meninos tava sai na rua na verão tud maskarod i k korpe pintod, pa espantá kes demónios de mau kolheitas! De kualker manera es ta dze kma se origem e um bokod obskure! Tem kem k ta dze k ses primer manifestação teve origem na Roma, ligod a kes famose rituais de orgias kes tava faze pra lá, onde k rei Momo e um dakes forma de Dionísio - deus Baco, kel rei de vinho, lazer, festas (sera k el e k e rei de paródia??), inserid na festejos de kolheitas, sempre nakela de komemorá vida i se renascer! Ou seja, karnaval, seja el de onde kel bem, sempre el foi karaterizod pa festas, divertiment publik, boi de máskara i manifestações flokorik.

Mesmo ess term "Karnaval" tem origem es ka sabe ao certo ondê. Embora es ta dze ma na latim medieval ja era possível otxal como Carnem levare ou Carnelevarium, palavras de sec. XI i XII, k tava signifiká véspra de kuarta-fera de cinza, ou seja, kond tava komeçá abstinéncia de karne durante korenta dia k katólikos ka podia kme karne, k'ta bá terminá na Páscoa.

Brasil sem duvda e ktem karnaval mas famose de munde. Ma ses karnaval foi levod pra lá, na ano de 1723, pa portugueses de ilhas de Madeira, Açores i de Cabo Verde!! Sim, de Cabo Verde! Na princípio ate el tinha nome de Entrudo por kausa de influéncias directas de portugues, k tava txma assim, kes brinkadera kes tava faze na rua: guerra d'agua, farinha (kem k kata lembra de levá k farinha na kara na soncent!). Hoje em dia es "batalhas" e de konfete ma serpentina.

Na Cabo Verde kond no ta falá de karnaval, automatikamente no tem k referi a karnaval de SonCent. Embora pa tud ilha (uns mas do ki ots) e possível otxá manifestason dess festa e k'ta kontagiá kualker um! Um kosa k devia ser espiod na CV: Vocação kultural/flokóriko de kada ilha i es responsáveis de kultura podia investi k'mas precisão onde k vale a pena!

Ess one li, segundo Inforpress, na SonCent, pa desfile principal de hoje terça-fera dia de Karnaval, tita ba sai 4 grupo, i um des e Maravilhas do Espaço, dpos de ter estod ausente pa um data d'one. Desfile ta komeca 14:30 i ordem de passagem e: Jovens de Monte Sossego, Maravilhas do Espaco, Sonhos sem Limites i Flores do Mindelo. Ma klaro la karnaval komeçá desde ha muito tempo! Se no levá em konta k karnaval e manifestação de celebração a vida, enton la karnaval e ka so 3 dia: e permanente!

Cesária Évora ta kantá "São Vicente e um brasilin...", ma alguem tinha dzid: Nah! Brasil e k um São Vicentão!

..bzot diverti ness karnaval, bzot fka dret!