Reflexao sobre Kultura

Culture is dead, by Jean Degottex, 1968

Pa kuando de Forum A Semana - Onde Estamos Para Onde Vamos, dekorrido na Soncent de 28 a 30 de Junho, Emanuel "Neu" Lopes, foi konvidod pa expo um tema de reflexão sobre kultura de nos terra. onde kno ta.. pa onde kno kre bai.. ess texto ta transmiti se percepção, se visão, de estado atual de kultura ne nos país, mas k de certeza e partilhod pa um bokod de nos.

Dai interesse em divulga ess texto o mais possível tendo em konta momento k no tita atravessá na Cabo Verde (kond nos primer ministro ta diskursa na abertura dum festival de juventude i el ta fala de transformá Cabo Verde num centro internacional de prestação de serviços) i importancia k kultura tem desempenhod desde de nascimento de nos nacionalidade em 5 de julho de 1975, 32 anos atras! ..bzot le:

Reflexao sobre Kultura

Nes ultime temp um tema e ktem estod mas e voga e passagem de cabo verde pa lista de pais de desenvolvimento médio. i consekuentemente, no tem estod ta fala sempre em desenvolvimente ekonomiko, financeiro, social, enfim tud o k no ta pensa ser importante pa real desenvolvimento de país.

Ma, n ta pensa, kno deve fala na imagem de nos país. i ess imagem tem sido bem divulgod atraves de ekonomia, de bom postura, de estrategias de desenvolvimente i ainda de kultura (the last but not the least). n dze ainda porke kultura e proveitod pa divulga imagem de cabo verde, ma nem sempre es ta dal destake i atencao kel ta merece.

Ta dzid ma um pove sem kultura e um pove sem identidade. i Cabo Verde, nesse sentid, ka ta fka ta deve nada. Nos e um pove multifacetod i kulturalmente riko. i por no ser um país komposte pa dez ilha, tud diferente i tud igual, k historia i povoament diverse, kel diversidade kultural e um rikeza k no deve explora i de k manera!

Sempre no foi kunxid pa nos kultura, i agora k Cabo Verde tita txma mas atenção i interesse internacional, e altura de no reflecti emdjor sobre ess tema.

No pensa primer kem k nos e, de onde k no bem, o k kno tita faze, o k no tita vive, nos enkuadrament ness munde globalizod, pa no pode, ao menes pensa sobre emdjor kamin kno deve segui. Pa onde kno tita bai?

N ta bem expo li alguns situação pa reflexão, seguind alguns areas kulturais distin, ou talvez nem por isso.

N tava komeça na musika. tem alguns one atras no tmá konhecimento dum fenómeno jamas visto, nem k nomes sonantes moda Bana, Voz de Cabo Verde, etc.. ess fenómeno txma Cesaria Evora, Cize! No entant, um artista k katinha kualker destak na se propria terra. Foi necessarie ke no rekonhecesse se real talento i rikeza artístika da Diva aux Pieds Nus atraves de um país estranger. inkuant isse no tava ba ta sabe de notícias atraves dum komunikação social k ainda tava k algum méfiance. n ta lembra dret k tinha um mentalidade k tava dze "mim n kata gosta de muzka de cabo verde porke kriol ka sabe faze muzka". Ma mesmo assim no sabe ma teve sempre produção musikal i txeu k grande kualidade.

Cize ta kontinua ta ser um grande fenómeno, orgulhe de nos terra, um verdadera embaixatriz de nos kultura. Txeu k nunka tinha notod k cabo verde ta na globo terrestre, passá ta txma nos terra de "terra de Cesaria". Txeu grandes artistas de renome internacional kre konhece, ou mesmo kantá ma Cesaria Evora. Embora nos tud sabe pa ess fenómeno ja tita ser partilhod pa ots talento: Ildo Lobo (k Deus o tenha), Maria Alice, Maria de Barros, Lura, Nancy Vieira, Tcheka, Mayra, i mute mas. Tud es fora de país.

Txam faze um pergunta agora: k tud ess desenvolviment musikal, o k kta pensod na faze k kes e kta estod li na nos terra?

Ta existi um data de talentos k mal aproveitod li na nos terra. tem txeu jovens telentos eskundid k projectos interessantes i k e ainda "ilustres desconhecidos". Tem ainda txeu k vontade de aprende ou de mostra kel kes sabe faze de emdjor. Isse sem fala na kes ot talent k katem destake ou atenção kes ta merece, moda kaso de Hernany Almeida, de Gamal, de Kiso Oliveira i kes kolegas de grupe Arkorá, de kual faze parte Orlando Pantera.

I, num altura em k sociedade kno ta vive ja prende a da mas valor a o k no tem a nível de intelectualidade kultural i kriativa, no ta pedi pa kem puder ajuda, pa tma iniciativas reais, pa faze kom k es talentes ka perde, pa incentivas a kriá kada vez mais, em beneficie de imagem de nos terra.

N fala de musika primer por ser um area kultural k nesse momente ta representa emdjor nos país. Atenção k n katita fala de kualidade, ma sim de kuantidade, pois se no bem fala de kualidade no tem k fala de teatro, artes plástikas, design, de literatura, enfim... um diversidade kultural jamas visto.

N ta reserva ainda um tempo pa fala de cinema. e k ess tema ta txam prop triste, pamo atualmente katem nenhum cinema em atividade na nos terra! Principalmente na SonCent onde k ainda no ta lembra de filas enormes i de merkado negre pa oia filmes de kualidade B. Um ilha em k cinema faze história, k ensina txeu gente a komportá emdjor, a fala ingles i tambe a s'nhá! Um ilha k tinha um cinema situod na um edificie historiko k e um de nos orgulhe.

Contude, kata bastá no lamentá sobre um kosa k nos mesmo e k kontribui pa se destruição. E nos e kta ba pa video clubes i aluga filmes piratas, de péssima kualidade, sem ter ainda licença de lançamento na K7 i DVD, k kata paga tud taxas k devia ser legislod i impost, k kata paga direitos de autor i k ta ajuda um televisão nacional a faze o k e bastante vergonhoso: emiti filmes k ainda tita ser ou tita ba ser exibido na cinemas. Tem lei pa isso, i kaso bzot ka sabia, um filme so pode ser exibido pa um canal de televisao meses dpos del ter sido lancod na DVD, k pa se vez, ja tinha esperod uns tonte mes inkuant kel filme tinha k ser exibido na tud cinemas. Ene a toa k aparelhos de DVD tem regiões diferenciod.

O k no ta faze num terra sem cinema i k ja tita produzi cinema dokumental i ktita realizá festivais de cinema? O k no ta faze kes video clubes k kata respeita direitos de autor? Sobre televisão nacional, n ta preferi nem ka fala.

No pensá ainda sobre teatro, em k kes fazedores de teatro ta sofre tud dia pa kria, ensina, transmiti mensagens, aktuá, kantá, enfim..faze tud k kualidade i em franko desenvolviment k e de konheciment de tud gente ness país, es katem lokais pa ensai i um sala de espetakulo em emdjores kondições. E de louvá traboi k Associação Mindelact, kja tem mais de dez one de vida, tem fete pa teatro i pa kultura dess país, num altura ktita ser falod na vende kultura ou autosustentabilidade de Centros Culturais.

No precisa de mais espace pa k kultura tem se real i merecido espace!

Pa onde kno tita bai k kultura, num terra onde katem um Sociedade de Autores kta funciona, obrigonde kriadores a rekorre a entidade estranger pa salvaguardá ses criação k fazes suá i buská energia k nunka existi? Monera kno ta salvaguardá kel momento em k inspiração txgá, porke pode ka txgá mas ou kaso el txgá nunka el ta ser o mesmo?

Se tem legislação, unton no publikas; se katem, enton no krias i das konhecimento a publiko.

E necessarie k lei de mecenato realmente funciona na kultura i k kes mecenas kater medo de entra ness aventura maravilhose.

E precise k direitos de autor ser salvaguardod i respeitod pa tud gente, porke inspiração katá provokod, el ta kontce!

E preciss incentivá intervenientes de kultura ness país, donde es emdjores kondições de traboi, financiamento, incentivos, segurança, lokais pa ensaiá, emdjores salas de espetakulos kom ekipament emdjor, alternativas. Da importancia i divulga traboi do artista enkuant el ta vive i de boa saude i nao faze moda kontce k Orlando Pantera.

Onde kno tita bai se governantes, edilidades dess pais, komunicação social i sociedade em geral kata apoia i da valor a kultura i a kriatividade i a kriação kultural?

No pensa, no analiza ess pais kultural k nos e i imagem k nos pais ta merece i deve tem.

Kultural ta merece!

Emanuel "Neu" Lopes*
Mindelo, 30 de Junho de 2007

*(Neu Lopes e TOIA de profissão i ator de teatro; ta faze parte de grupo teatral SarronPontoCom)

...Bzot fka dret!